《万千星辉颁奖典礼2024》将于本周日举行，3届“视帝”黎耀祥凭《巾帼枭雄之悬崖》有望4夺大奖，刷新最强“视帝”纪录。 演戏近40年的祥哥分析赛前形势，神预测是TVB力捧中的张振朗及张曦雯世界；而罗子溢搭张曦雯就是次热；他更自爆曾被老友刘青云泼过冷水，弹他演得麻麻地就失去信心：“佢老实不客气评我‘冇演刘醒演得咁好。’

60岁黎耀祥对演戏好有研究，唔止戏好还眼光独到，过往预测“视帝”、“视后”都有8成准，他分析说：“一个人喜怒哀乐、表情、讲嘢、语气唔会变化得太大，每个演员演绎嘅方法，会有人钟意会有人唔钟意，所以都系从角色上出发，而非睇功能及演技。”

▲黎耀祥突然对冲击4届“视帝”失信心。

振朗曦雯年青化组合

今年祥哥都有点心水，会用张振朗及张曦雯做胆，拖陈豪、罗子溢及杨茜尧、林夏薇做脚：“我觉得振朗《反黑英雄》中角色几讨好; 阿Mo胜在去年攞过，今年蝉联会系一个话题，而且佢演技稳稳阵阵唔会太差；谭俊彦跟阿Mo同系《企业强人》战友，两者选其一陈豪比较成熟啲，成个戏压场感重心好啲；罗子溢系只黑马，《婚外情》都做得好；‘视后’反而好难拣，因为林夏薇《黑色月光》做得好；同剧嘅杨茜尧够经验，压场感好强，而且个戏围绕住佢；胡定欣《巾帼》个戏复杂要加分，以'七爷'角色取胜；张曦雯《企业》角色都好，加上佢cool cool哋fit晒个角色，而且受力捧，又做咗咁多年，计返客观条件由佢拎都唔差，所以佢都系大热，但如果计埋私人感情，梗系想胡定欣得啦。 至于张振朗及张曦雯齐齐获奖呢个画面好睇，好年青化。”

做朋友要老实不客气

他对再冲“视帝”信心都是麻麻地：“其实角色系写得唔错嘅，个剧有张力，人物关系、事情转接及峰回路转结局系最复杂嘅，亦都尽咗力演出，但《巾帼》始终唔系最hit嘅戏种，民初戏比较老派啲，近年大家都钟意睇时装剧，要求年轻化及时代感，呢方面系蚀咗嘅，我成日觉得攞唔攞奖，跟角色、 戏种及观众钟唔钟意好紧要，演得好好，但观众唔钟意呢个好尴尬...”他又自爆相识几十年老友刘青云不时会给他评语：“佢话我‘呢个戏演得麻麻哋㗎咋！’觉得我冇演《巾帼枭雄之义海豪情》‘刘醒’咁好，但冇详述原因，其实我有估过嘅，可能‘刘醒’比较踏实，佢系钟意一啲实在沉得住嘅人物。 （青云泼你冷水？ ） 系好老实唔使客气，朋友先唔使客气，佢嘅意见好啱，我梗接受，做得唔好一定有啲原因，睇返《悬崖》系有好多不足之处嘅，对自己会有失望，只能叫仅仅合格。”祥哥又弹自己近年有几套剧作都做得唔好：“除《杀手》比较好啲，《轻. 功》只能话系OK; 《拳王》又犯咗另一种错，冇考虑到气氛，将成件事压得太低沉，作为主角难辞其咎。”

要发掘新血承传行业

问到是否刘青云的坦白，打击了他角逐“视帝”信心时？ 祥哥就直认：“唔会只得佢，佢只系其中一个啫，会综合好多意见去睇嘅，我坚持唔可以用人哋赞赏做标准，因为赞你有好感、有同情分、有啲体谅... 有好多原因，呃到人呃唔到自己，反而人哋弹就你就要留意。”最后黎耀祥强调颁奖礼其实是一个宣传推广活动，用意有个选择心态带起观众留意，投入去睇戏：“作为同业边个攞奖都要支持，每个演员都要辛苦付出，而且生意难做，电影、电视行业非最蓬勃阶段，系咪要努力发掘多啲新嘢出嚟？ 系时候佢哋要接捧，承传对成个行业系有需要嘅。 我仲做紧，再畀（奖）我，咁几时轮到佢哋呀？”

以上内容归星岛新闻集团所有，未经许可不得擅自转载引用。