4月13日，大致多云，日间短暂时间有阳光，初时局部地区能见度较低。隔晚美国公布CPI低过预期，美股早段全面高开，不过联储局又有官员走出嚟放鹰，加上股神巴菲特指银行风暴尚未完结，美股其后由升转跌，道指跌38点；标指跌16点；纳指则跌102点。标指仍无法突破4100阻力，炒减息预期暂告一段落，喺未有其他更好消息下，美股未能进一步向上突破。美股稍后又到季绩公布，市场正等待更有值博率嘅水平先愿意出手。周五晚先有银行股公布业绩，睇睇届时市场反应如何。

股神巴菲特认为银行风暴仍未过去，指将有更多银行面临倒闭，原因系存户虽受到FDIC保障，但FDIC亦唔系代表由政府去承担风险，而系由其他银行缴付保费去承受，即系话再有类似SVB事件发生，亏损系由其他银行埋单，所以佢暂时唔会投资银行股。股神此话一出，银行股隔晚全线向下。

除咗银行股脚软，中概股亦明显走弱，出现洗仓式下跌，富途、拼多多、阿里、哔哩哔哩跟京东，全部跌5%或以上。而阿里主要股东之一嘅软银，表示已完全沽售10%嘅股份，已正计划再沽出手上余下一成阿里股份，阿里股价应声而下。之前阿里跟京东先后公布重组，并计划分拆业务上市，巴巴一度重返红底股，可惜红底股身份未能守住，讲完一大输，分拆连楼梯都未听到声，呢头软银就又话减持，若然系信佢分拆高追，又再中伏。中概股放风炒上割韭菜，都唔系今时今日嘅事，自愿跟风高追做点心，都系无乜好埋怨。阿里都算系咁，由宣布重组到软银话再减持，都有成个星期时间畀人逃生，反观京东(09618)呢头话重组，消息公布一日已现完。京东最难睇系呢头一公布，嗰头就见刘强东减持，摆明系好消息出货，都唔怕市场话佢内幕消息先出货，真系自己唔尴尬，尴尬嘅就系人哋。

港股目前嘅情况系，久唔久就借消息挟一挟，但一直缺乏资金肯正正经经入场买货坐定定，港股嚟嚟去去就借消息炒作，塘水滚塘鱼，暂时恒指喺20000点上上落落，值博率有限，更何况金管局连番接港元沽盘，资金有出无入，试明靠乜嘢支持大市向上。呢啲市况，真系宜忍忍手，否则误信消息冲动高追，随时又做大户点心。

以上内容归星岛新闻集团所有，未经许可不得擅自转载引用。