中环聚会之地系英式酒吧，好有英伦风范，大家又在一起，谈天说地，忽然讲到007占士邦会有第七代传人。

英国喺上个世纪六十年代系仅次美国之世界第二强国。“安仔，你无嘢呀，苏联去咗边，你当佢无到。”大家正在怀旧，我有感而发，皆因当年铁金刚电影系列，尤其是辛康纳利之演出最精采，如是者，全世界都当英国先至系Number Two。我从细到长大都认为苏联畀大英帝国压住。“你都九唔搭八，你活在电影世界，你不如话中国有如来神掌，唔使'东风快递'（内地网友戏称东风系列导弹）都可以震慑全球。”

“世侄，饮杯冰冻啤酒先啦，英国依家好大镬，有啲迷信人士指新版铁娘子脚头唔好，一上台就无好事发生。”张翁，英国依家系“唔得掂”，睇新闻话，英军军粮唔够用，工余要去“麦当当”卖包包。银行伟话英镑唔多睇好，今个冬天仲可能冻病好多英国人，目前英国通胀超过10%，资金正要流出去美国避险。

我上网搵新闻，点知搵咗条旧闻︰“英国不再是一个大国，而且将永远无法再成为一个大国。”英国前首相马卓安早两年有感而发，“英国现在是二流大国的佼佼者，但无论我们如何努力，狭小的国土面积和人口规模，在本世纪未来，英国将被那些大得多的国家超越。”当时好多人怀疑这说话有几现实，原来英国低处未算低，英军今日要“秘捞”，仲有可能上山劈柴取暖，好似同上世纪六十年代内地有得比，当年解放军都系要打几份工，其中之一系落乡下耕田，帮手养猪，张翁有无记忆？

“我无乜留意内地新闻，不过，当年之英国好巴闭，军情六处MI6之情报人员过的都是花花公子生活，伊安法兰明1953年移居牙买加退休，创作了第一部占士邦小说《皇家赌场》，灵感与题材来自佢经历， 1967年拍同名电影，主角是大衞尼云，一出场就系成个富豪咁款。”大家以为英国好强大，情报人员得闲搵赌王拗手瓜，唔知系唔系用公帑？

“我睇铁金刚电影，以为英国先至系世界科技强国，部部电影都有新研发，差啲可以登陆火星。”除科技之外，辛康纳利塑造出英国绅士间谍的风流形象，不同于冷峻木纳的苏联对手，神秘而不讨好的东方某国强敌。英国大国的优良形象，在于围绕在占士邦身边的各国佳丽“邦女郎”。讲开又讲，英国依家财政有咁艰难，邦女郎质素会唔会跌Watt？

饮完一Round又一Round，大家好怀疑大英帝国点可以再拍007占士邦系列？再搞落去，你真系要第七代占士邦好似星爷咁，踎喺深圳猪肉档做肉类处理员。“反正英军都要兼职，情报人员卖猪肉，好合逻辑啫。”大师兄话︰“安仔，你唔好咁讽刺啦，唔通第七代占士邦搵华裔人士演出？”有乜出奇，听讲大热第七代占士邦系英国黑人演员，又有可能搵女士当铁金刚。

好囉，搵星爷做就真系爆啦，唔知到时邦女郎会否全数用“星女郎”？搵埋闻西客串就最精采。“讲开又讲，原创占士邦已经过百岁，呢条桥点自圆其说，其实英国真系再唔系昨日之帝国，不如谂下新故事好啦。”零零漆抑或零零发，你自己拣一个，开头场景一定系维多利亚港。“不过，去到尖沙嘴就大镬，成街吉铺，你想拍乜呢？”

其实勒卡雷先至系间谍小说之王，因为好有深度，唔系吹水搞娱乐，佢都系MI6情报人员出身，早在上世纪六、七十年代已经在小说中踢爆英国情报人员好穷，上头成日Cut Budget，时不时又要裁员。“唔系呀，裁员？”系，勒卡雷笔下好多英国海外情报员就系打薄先知无得捞。“咁点呀？于是说好似歌神首歌︰即刻走去搵嘢做。”

大家吹下吹下，吹到占士邦都无粮出，要去搵嘢做，最佳选择系做反间谍，出卖自己情报。当然，如果你好爱国，都可以去“麦当当”卖包包，又可以学星爷做住肉类处理员，等闻西有消息，通知你可以再开工。

人生如此变幻，英国再拍007，令人有好大想象空间，大家有无灵感，可以赶快创作一部新铁金刚传奇？“系噃，安仔，今晚返屋企谂下桥，随时有机会进军荷里活，你咁有创意。”讲呢啲，饮杯啦！

以上内容归星岛新闻集团所有，未经许可不得擅自转载引用。