郑伊健跟许恩怡（Natalie） 在梁礼彦执导电影《久别重逢》首度合作，两人年龄虽相差37年，但伊健的亲切令Natalie放心沟通，更鼓励她主动打开Ian心扉，帮助演出。 电影有提到重回人生重要时刻，梁导就想返回此片在日本拍摄时，而伊健和Natalie同样想重返中学时代，不过伊健因当时有太多遗憾，特别想有个正规校舍跟同学开心度过。
梁礼彦导演构思故事时，已认定郑伊健是男主角“苏升华”不二之选，“呢个故仔必需要系擅唱歌嘅人，仲要好善良嘅人先得，因要同个后生女一齐出发，稍为冇咁善良，个感觉冇咁舒服， 而佢仲有份童真，呢3个条件就谂起佢，亦只有佢可以做到，佢肯应承我好开心。”伊健觉得故事有趣外，还有“私心”想接拍，“戏里面呢个世界好有意思，仲有个原因话去日本拍，哈哈！ 我觉得成件事好吸引，系个挑战。”伊健为角色专登买结他苦练，就是老婆蒙嘉慧在ViuTV《呢度住吓嗰度住吓》中平卖那支，“支结他最近卖埋畀（吴）保锜啦！”他解释最初导演要求弹琴，后尾才转弹结他，“但系我喺日本喎，咪即刻去买支结他， 有个课程唔知几钱一个月，唔理学啦！ 就勉强应付到，琴有得遮，结他一定要拎住，一定要学唔系唔似，但系好难。”
▲伊健中学时代没有机会好好享受校园生活，成为人生一大遗憾。
钟意同新生代合作
57岁伊健今次跟年轻班底合作，他觉得新鲜又好玩，“你知道我向来把工作这个战场会变成游乐场，会觉得好好玩，同埋唔同年代，导演、摄影师成个班底好年青，又可以感受吓，导演唔会闹人，我哋个年代导演会好大声，现在冇㗎啦！”他解释连续两套作品跟年轻导演合作原因，“我其实系刻意，有好多戏我系唔接，我想做啲我见到锺意嘅嘢，譬如《深宵闪避球》、《久别重逢》，我想做啲未做过未玩过，想同新世代合作先有化学作用，如果做到或者将自己一啲嘢放低在他们身上，或者他们可以将啲立场放咗喺我身上，这件事已经成功咗。”访问时Natalie跟伊健互动好搞笑，会不时互窒，她坦言完全感受这个大前辈的优点，“第1次见佢就feel到佢嘅energy，超级温暖，佢唔系开工变另一个人，系一模一样，拍摄时系超级包容，演戏时好舒服。”这令她拍二人感情戏时，亦更易投入，“成个团队一齐去日本系个联系，即刻觉得close咗少少，佢即刻对我好好。”伊健忍不住笑，“即刻，哈哈！ 佢啲中文系有啲问题。”
▲伊健跟梁礼彦导演和Natalie虽是初次合作，但已变熟络。
Ian最似内敛性格
戏中Ian（陈卓贤）@MIRROR饰演伊健年轻版，梁导解释找Ian除了其音乐才华，还发现他跟伊健都有内敛一面，伊健都相当认同，“佢同我以前好似，唔知你记唔记得？ 我以前系好少讲，记者话访问郑伊健就弊嘞！ 试过同DJ做访问，我净系话系呀、唔系呀、好呀，佢都唔知点应付，Ian刚见我们时还是不说话，我叫Natalie 同佢倾多啲偈，呢个系几共通。”Natalie感激伊健鼓励她将Ian“这个冰山劈开”，因对演出有好大帮助，“我头几日同Ian拍，佢比较严肃啲静啲，同伊健哥哥拍，佢问Ian点呀？ 叫我唔好放弃，要坚持落去继续同佢讲嘢问佢问题，如果佢冇同我讲，我有少少位觉得系咪要畀啲空间Ian呢？！ 佢咁讲我就摆喺我心入面，系咁同Ian讲嘢，佢慢慢开朗啲，都倾到偈，对我哋角色好紧要，如果冇呢个连系系睇得出。”
恨有正规校舍上堂
电影中提到重回人生重要时刻，问到3人会选择那一刻？ 梁导就最想返回电影在日本拍摄时，拍呢套系人生一个太大转变，去到日本 我系最轻松，唔知点解，我哋喺香港拍咗19组，停咗一阵再去日本拍，去到日本拍系我发挥得好、最舒服时间，个人又松，好享受喺日本成个拍摄过程。”20岁的Natalie已经想重返学生日子，“我无论遇到人同老师都好好，嗰时最大烦恼行返学时畀蚊咬，最钟意食嘅曲奇饼卖晒，唔记得带衫上PE堂，谂返呢啲好少事。”伊健无奈话：“你就好啦！ 我未试过畀蚊咬，冇带去操场啲衫，我连操场都冇。”伊健羡慕因中学时代并非太愉快，“我又系想返番去中学阶段，因为中学阶段太唔幸福，人生过得最唔美满就系读书时，原因系因为资源问题我学校得半日，系冇操场可以好健康去上堂。”冇正规校舍令伊健相当遗憾，“从来都冇，冇得同啲同学仔正常返全日，一齐放饭，一齐读书做课外活动， 我睇佢哋拍好开心，喺度踢水系好无聊，但最快乐，因为最冇压力。”
《我的歌》同电影超夹
伊健1996年歌曲《我的歌》在电影中起重要作用，梁导指最初是希望在伊健作品中搵首歌配合电影，意外发现到此歌，“呢首歌系天意地连歌词都啱埋‘现在过去到未来’，嗰时我同伊健同陈光荣讲想用呢首歌，佢哋有讲呢首歌系点嚟，哗！ 好啱。”伊健解释歌曲创作过程，跟电影主题有很多不谋而合地方，“当时我同陈光荣去尖沙咀录音跑住去攞车，突然见到个老人家，揸住支结他好似冇乜意识咁，就谬不如写只歌系讲个创作人好劲，但有日佢把声冇咗改为弹，但最后都系弹唔到，但只歌其实喺佢心里面，只歌畀咗黄伟文填，佢改咗少少唔讲创作人讲歌手。”戏中Natalie会翻唱《我的歌》，她直言未拍这戏前未听过此歌，伊健笑谓：“未知我呢个人嘛！”但伊健大赞她拍摄时，即场演绎得很好，“佢喺现场要弹要唱仲要演埋，佢竟然做完话觉得唔够好，后尾再做都话唔够好，我话你点解觉得唔够好？ 我觉得好好喎！ 死啦！ 唔通大家有分别，佢哋要求咁高，我要返去三思吓。”
以上内容归星岛新闻集团所有，未经许可不得擅自转载引用。
